亞洲釣魚人 | Asia Angler

今日三劍俠去磯釣，趁住大流釣返兩手，全日4、5級風，找了個避風位作釣，表弟在碼頭已急不及待去公廁開粉，去到釣場他已立即開竿，我就例牌要開兩兜餌，所以遲了很多才作釣，雖然表弟釣先，但第一個中魚竟然是R小姐，她高興極了，她練習磯釣已一段日子，知識與技術也有提升，但就係未中過目標魚，今次真的發威中了條黑沙鱲了，而且她說這條黑沙鱲是釣咁多條之中拉力最强，解晒毒。前後不到5分鐘，表弟又中條石蚌，至於我就中埋D魚仔，直到打晒我兜餌都係一海魚仔冇料到，之後我齋用釣餌作釣，釣釣吓冇晒魚仔化餌，機會來了，立即投下釣組到我之前狂打過粉的位置，不到10秒立刻飛波拉竿，我唔抽竿都唔係人啦，嘩！拉力非常强勁，令我全日的霉氣盡消，玩了片刻，條魚上水，是條靚仔連尖來的，爽死了！之後不久又中黑沙鱲又是拉力十足，最後再中多條連尖便冇晒釣餌了，但今日已十分滿足吧！

今日下午有空檔，同R去咗Hea釣幾粒鐘，玩浮波不打餌。由於唔知D內地人有冇逼爆東涌，所以R煲了冬茹瑤柱滑雞粥做午餐，我哋唔使同人逼去食野。去到釣㸃食完野便開竿作釣，一飛個釣組落水，發覺全無流水，有如一潭死水，釣到應該水漲之時，竟然D流一D都冇郁過，最後我只中老坑及油立各一條，R只中條黑沙BB。

我的Daiwa救生衣出廠已6年了，而且舊款物料很厚，穿起上來又熱又臃腫，應該係時候換過件，行晒佐敦D釣具店，最後去咗世界找到件啱心水嘅Daiwa老救，而且佢哋又做緊特價，重有5倍積分當錢使。呢件老救設計輕巧，物料夠薄，釣魚時行動方便很多，而且冇咁熱，於是我就掃埋佢最後一件，等釣魚着新野先！

上次磯釣R話唔夠喉，話要今次再去解毒，R知我肯陪佢，特登用鮮魚湯底煲了瑤柱海鮮粥給我做早餐，味道果然鮮味無比，多謝R！去到開竿第一投，我先中條唱歌婆，之後咩魚都有D，全日所有魚都好精口，特別是條黑沙鱲，先來輕輕啄兩吓，之後成分鐘都冇反應，我就把條蟲扮逃走地拉郁兩三尺，跟住佢又啄兩吓便停了，我又再拉，如是者玩了四五次，第六次條鱲先拉竿頭，我立即抽竿，中了！條鱲中伏後瘋狂拉竿，猛烈游走，手感非常良好，玩到夠皮便起佢上嚟，滿足晒。而R都有幾條魚中吓，今次都叫做解到毒吧！

祝亂掉垃圾的釣魚人一世釣垃圾，所有釣具被大浪捲走！

今日同R與表弟去磯釣，天氣温度及潮水都唔錯，但就你冇大魚，越釣得耐魚仔越多，全日中得最多就係石狗，走人時艇家話連續兩星期都有鱲釣，今個禮拜唔知游晒去邊度！你地唔好彩吧！唯有怪我自己同D鱲冇緣啦。

見年尾將近，自己張世界會員咭還有積分，於是走去老銅世界買野用埋D分去。初時冇咩心水，之後見到餅新出Daiwa競技磯釣絲幾吸引，就用D積分補錢買餅來試吓先。

諗住今次帶個新冰箱去釣魚想整靚D去開光，所以早排行晒成個佐敦D釣具店，但冇一間有Daiwa嘅冰箱魚尺貼紙賣。好彩最近去海磯舍竟然有Daiwa魚尺貼紙賣，真係天開眼，臨到出磯最後幾日買到，正！

上星期去了漁家，想買丸九朱古力粉，但冇晒貨，好彩見到有HIRO粉，買了兩包高比重鱲粉，33蚊2.2kg一包，比起我原先買粉預算慳2倍 幾 價錢，抵買！就等今週放假出磯試吓D粉嘅效果啦。

今日同R與表弟hea釣一個上午，9點到達釣㸃已見到有師兄釣緊，好彩今次不是很多人釣，總算找到位分給3個人釣，玩咗1粒鐘，在沒有魚訊下被瘋狂化餌，之後終於上到條泥鯭，先知原來係呢班契弟玩野化晒我D餌，跟住再釣終於感受到魚訊，但食得好輕口，啄兩三吓便停咗，再等成分鐘先再啄幾吓，如是者玩咗幾分鐘，最後先稍為拉吓竿頭，呢個時候唔再畀面佢了，用力抽竿，中了！條魚拉力唔錯，玩咗一陣便起佢上來，原來是條絲鱲，唔錯。不久R也中多一條，而表弟就龜咗，之後化晒魚餌，時間接近下午一㸃，hea釣完畢，收野去食飯了。