亞洲釣魚人 | Asia Angler

重陽節去釣魚，用了R小姐一支冇號數360小磯竿，1.25號子線，青蟲打沉底，很高興釣到條巨連米，由於冇帶撈箕只好硬抽上水，成支竿仔彎到不似魚竿，解鈎後條魚狂彈甩手，成條魚在大石上向海飛去，我為咗捉返佢搞到仆街雙腳跪在石上一手撳住條魚，咁都總算捉得返，但我膝頭就爆了缸，咁樣捉返條魚我唔煎咗佢來食就奇呀，好彩煎好條魚食落口確係零捨不同，鮮味無比而且更帶有一點蟹肉味，真係好食到爆！

今日去釣返幾粒鐘，諗住初三應該流水唔錯啦，點知成個上午D流都唔係幾郁！搞到要釣魚毛，好彩天氣幾好，秋高氣爽，釣唔到魚都唔覺辛苦，希望下次會有返D魚釣吓啦。

我呢個十幾廿年前嘅舊款Daiwa LBCD絞個手柄T字把手用到爛溶溶，所以冇用好多年了，但最近見到我Ｄ師兄把他同我一樣的絞換了個很美觀的波頭把手，心想我的絞有希望了，問了師兄他說是朋友幫他淘番來的，於是我又上網看看，但找了很久也找不到，好彩最後給我找到一間舖直情有得賣整隻手柄，而且價錢不貴，這比起買波頭回來DIY來得方便，不過我買這隻手柄也有風險，因為在網上沒有得試，全靠文字講出來吧，但100蚊人仔可買個希望而用得返千幾蚊個絞，搏一搏都值得嘅！ 之後 寄咗來了，立即換來試試看，一試之下Fit晒，之前心裡的風險一掃而空，呢個一絞三杯嘅古董又可以重生了。

收到料灣仔聯盛啲Daiwa磯竿大平賣，走去看過之後的確好平，我買了支DXR1.25 530，價錢比正價接近六折，的確抵買，其他的大島竿及Megathis都平了一節，各位Daiwa迷一定要留意一吓了！

聽R小姐講世界返咗好多2017年新冬季衫，今晚就去老銅睇吓逛吓，又畀我找到件平平地嘅外套買吓，埋單時店員話有獎抽，佢攞咗個抽獎箱畀我，我一看之下唔係嘛！成個大箱得嗰十零張飛，心諗梗係抽到水尾啦，不存希望下抽了一張給店員開嚟睇，點知佢同我講我抽到一等獎，我心想真的咁好彩！？跟住他們同我講之前好多客都抽唔中，D一等獎就係留下剩番喺嗰十零張飛之中，真係運氣來時係你就係你了。之後他拿了個獎品給我，原來係個船絞，由於我唔玩船釣，所以諗住賣咗佢，收番一千幾百都好吧！

我發誓今日釣魚沒有打龜，因為我還有中到一條魚！！！

今日去荃灣研釣舍逛吓，見到佢有Ｄ釣研浮波減咗價，其中見到隻征黑浮波只賣$60，十分之抵用，我同R小姐每人掃佢3粒，用來走去釣鱲試試佢先。