與白鬚公搏鬥20140713

7月13日星期日，又到西貢釣魚，R小姐因中魚中了釣魚毒，成日叫我去釣魚，碰啱呢日大流，就去釣番鑊啦。今次比上次再早多一個鐘到達，因為流水早咗個幾鐘便退，所以一定要抓緊時机，去到釣位我地立即開竿釣魚，我又係第一投便中沙鱲，心諗又會唔會像上次般釣上一群沙鱲呢，但點知嚟咗三個强國人，走來玩浮潛撈生蠔，走了過來在我下面，話佢都唔走，個海咁大都唔識得張就吓人哋嘅，係都要搞搞震，搞到乜魚都走晒，等咗半個鐘佢哋找不到生蠔先至游咗另一邊。之後我又要等多半個鐘等啲魚游番埋來先有得釣，頭尾足足令我冇咗一個鐘頭黃金時間，真係激到我死咁滯！後來終於有魚訊了，發覺食得好輕口，初時還以為啲鱲仔所為，但愈食就愈重口，跟住我覺得時机到了，一抽竿，魚竿立即猛烈下沉，釣線不停在海中打轉，心諗今次重唔俾我開番舖大，初時覺得是黑沙鱲的走法，但牠不停橫走拉絲，一點也不回頭，完全是回游魚的性格，那時才發覺不是黑沙鱲，由於我只是用號半絲，我的磅頂不停地出絲，條魚又直走向岩石處正要過石，唯有搏一搏擰實磅頂，用力抽起條魚，希望唔好斷絲啦！好彩俾我成功救魚，幾經辛苦用力收到埋身邊，但我又冇帶撈箕，又要博多一舖，大力彈條魚上水，一上水放了在大石邊，魚勾就自動甩咗，呢舖真係博得盡了！定一定神看看條魚，原來是條白鬚公嚟，唔怪得有回游魚那種勁度啦，看看條尾便知是高速魚了。之後釣多兩條細魚，水位已退至最低點了，一點魚訊也沒有了。但好一個R小姐在短短一兩小時，都俾佢釣番十零條魚，又有沙鑽又三鬚及廉咪，都夠一餐餸了。