亞洲釣魚人 | Asia Angler

今日玩打粉，又學人玩玩拍片，攞齊camera及腳架，㸃知一開波就出事，因我帶咗廿幾年前的陳年腳架去用，諗住都殘晒，唔使𡃶住來用，但㸃知真係殘得濟，一用就甩咗粒上實相機的螺絲出來，重跌埋入石窿，死得！我只好在腳架其他位置取出近似的螺絲去頂檔，緊緊上到幾吓，但上唔實，成日因重量不均而自轉，搞到拍埋D唔正確的畫面！好難得先影到些少重㸃影片，遲少少我便放條片show畀大家睇吓我釣到D乜野趣怪生物。

昨晚過節夜瞓，今朝半夢半醒去解毒，是日帶咗一兩蟲及假餌去釣，用青蟲一開釣沒有半㸃魚訊，過了成粒鐘浮波先郁吓，但只是魚毛搞搞震吧，初時釣三竿水，之後越釣越埋，玩到竿半水，有返D大魚訊，但勾咗幾次石，子線越玩越短，但我覺得勾石斷線再綁鈎的釣棚是最Fit的，釣了一陣，浮波慢沉，跟手抽竿，發覺支竿定格彎晒，頂你！唔通又勾石？大力抽多吓，支竿 終於 識震了，真係中魚啊！條魚衝了幾吓，玩了一陣被我玩謝了，收埋佢上來入冰箱。之後中多幾條魚仔，一兩蟲用晒，但沒有用假餌磨爛蓆便走人了。回家晚上清蒸咗條魚，㗳落真係超嫩滑，老豆阿媽都話頂瓜瓜！

打完風去解毒，買1兩蟲去hea釣，今次是玩浮波但冇打粉，一飛個釣組落海，浮波即有反應，但個波上上落落便知唔係好野，不久便中條泥鯭上來，始知原來是泥鯭化餌，之後不停飛個釣組去尋找新目標，好彩也中到牙㸃同黑沙這些目標魚，但也只是魚仔吧，全部把牠回歸大海。帶去D蟲化晒了。新玩意出場，那就是我的新玩法，浮游磯釣拖假餌，我地用一隻假蝦"古"飛落去試釣，反應又幾好喎，魚訊不斷，但最估唔到的是諗住假餌可防止小魚化餌，但竟然連假餌都咬爛！由於今次只是hea釣，沒諗住磨爛蓆，所以走人去食tea吧了！留待下次再玩呢個新玩法。

之前釣剩兩幾蟲，今次一於偷釣兩粒鐘玩埋佢。少少時間少少魚，成正比的釣果！

重諗住今日天陰有雨，同R及表弟去解毒，㸃知就出猛太陽，曬到成個矇面超人咁！今日我中得兩條魚，影相只影條魚就算，R臨收工前一粒鐘係咁起魚，算係食番個尾糊，而表弟今次好有興致玩打粉，皇天不負有心人，又畀佢中番條合格黑沙鱲。

二十年前到塔門露營釣魚加影相，那時這裏還是少有遊客到此的地方，對我們玩這活動的人來說真是天堂一樣，最記得每當上岸時便有隻唐狗小黑前來接船，跟住牠像知我們去邊似的帶着路與我們玩着地跑去目的地，直到我們到達才離開。由於那時我們冇用冰箱的習慣，只會帶爐具煲水沖杯麵吧了，至於魚餌頭一日用帶去的青蟲，第二日便拾石螺來釣了。基本上，這裏不適合打沉底，但當時我們只識如此，所以勾石斷線成了例牌的事，這樣當然釣不了很多魚啦，但我們就是樂在其中，可能我們的目的並不只是志在中魚，而是享受擁抱大自然的感覺！直到現在，到處也是遊客，想找個清靜的地方擁抱大自然也很難了！

今次同R去試支Daiwa 小繼磯2-270，睇佢竿仔幼幼，但又幾好力，而且都幾敏感，手感唔錯。今次是玩死流，一早去到水流退盡返漲，把握時機都中到D魚玩吓，釣到下午走人去找個靚位享用R整畀我食的午餐，滿足晒！

剛剛睇返D歷史相分析釣況，見到機場未起大橋時D黃腳多的是，那時我在這裏釣魚從不打誘餌，只帶半舊南極蝦磚一邊溶雪一邊釣，加埋支鱲竿、B浮波及1號子線，咁就解晒毒。