亞洲釣魚人 | Asia Angler

今晚經過Sea Hunter見到有隻石鯛模型放咗喺度，立即買回家與我現有的黑鯛做個左右門神旺一旺佢先！

上次R單拖偷釣冇帶撈箕，眼白白睇住條大斑走甩咗，今次叫埋我呢個漁僮擸晒架生去幫拖，但可惜好境不見了，她只中兩條魚毛，相都冇影便飛番落海，反而我呢個漁僮重有D魚仔玩吓！特別多謝R煮咗D美食慰勞我，有釣回來的海魚煲魚湯加橋麥麵，冰震牛丸及菜心。大滿足！

今日行灣仔老聯，見到佢隻新款Daiwa IMPULT LBD 絞，售價超平，呢個絞原價$51,000日元，現在以低過6折發售，真係㸃可以唔買番隻呀！R小姐就醒目，1個月前已知佢有筍價貨出售，家吓輪到我掃番隻，好彩還未畀人掃晒！

下午好天去咗解毒，順便試吓支新買嘅飛竜，食埋野去到開釣都4㸃鐘，雖然今日係死流，但流速也是很快，要釣到差不多走人前半粒鐘先定番，今次雖然沒打粉，但仍然被很多尾指釘公及老泥圍攻，好難先中條似樣嘅火點，算係新竿開到光吧！

今日行佐敦，經過漁家見佢成個舖面貼滿特價Post，入去看看咩料！又真係有D貨品減到好平喎，摷吓摷吓又畀我見到套舊款Gamakatsu長袖吸汗快乾衫褲以半價有多出售，個款又幾靚仔，最緊要有我碼數而又衫褲都啱我着先正吖嘛，於是拿拿淋同R每人掃一套，以三百幾蚊呢個價，買件GAMA防曬衫都冇可能吧。現在可以買成套，我覺得真係超值！

陪住我釣魚多年上山下海日曬雨淋的Olympus TG-2全天候相機終於壞咗，現在換來第五代的TG-5，解像度雖然沒有提升，但ISO及影像質素就提升了很多，而且還有4Ｋ拍片及超微距影像拍攝，夠晒我用嘅要求，我綜合所有牌子嘅全天候相機的評分，TG-5係最掂的，所以再一次買回Olympus呢個牌子。

十幾年冇買過鱲竿了， 週 日行世界見到有支舊版飛竜賣特價，發覺佢個Spec.還比2018年新版飛竜還要好，新版Spec.有嘅舊版都有。舊版有斜"街"，而絞座又與支竿一體化，新版反而down grade咗沒有了，正價還比舊版貴，上網看看，原來日本網購舊版飛竜早已賣清光，見佢咁吸引，於是同R每人掃一支，本來想買銀狼鱲竿，現在只用三、四成價錢買到支啱用嘅竿，又慳番唔少錢了！

今日下午同R一人一兩蟲去hea釣，魚訊比想像中少，4㸃去到R首先中魚，之後一路都好靜，等到天都暗晒才給我中番D魚，釣到8㸃鐘冇晒餌而且天都黑齊，於是走人去食飯，總括今次hea釣成積算係不過不失啦，算有D魚玩吓吧。

自從2014年尾中過金古之後，大橋工程跟住擴大，一直都釣唔番佢，直至近排才知道有師兄喺呢度釣到金古，我的金古夢又燃燒了！

今日放假，喺雪櫃攞咗六日前買的半死青蟲去釣埋佢，今次又係去番老地方hea釣，一早去到魚訊幾多，都有D魚中吓，但不久離遠見到烏雲密佈順風吹埋來，跟住就落大雨了，等咗大半粒鐘後停雨，立即再釣，中多一條連米後便全無魚訊，過了一粒 鐘 後見D蟲瓜晒溶埋一篤，勾都勾唔到，廢事磨爛蓆了，走人去食Tea吧！