去赤柱釣番一粒鐘20180729
昨天R走魚唔忿氣，今日典晒地話要再去釣過，於是同佢講了一輪數，我就准佢輕便裝去赤柱釣番一粒鐘啦，跟住去行街食野，是次我沒釣魚，只做漁僮服待R，喺呢個鐘之內R中了4條魚，size都唔錯，而且手感非常好，總算為R解了一時之毒，我都鬆一囗氣，唔使佢賴死唔走吧！
文章
泥鯭球化餌速度快到冇野講20180728
見天文台話週六好天，所以去了機場玩打粉，㸃知呢日過份好天，一早出猛太陽熱到成三十幾度，真係熱到人都癲！去到打水開餌搞埋R嗰份共兩兜餌，開完已出晒大汗，由頭濕到落背脊，飲水休息了一陣便開始開竿釣魚，初時流水剛漲盡，水流不快幾好釣，R就在此時便中魚，是條幾好Size的火㸃來，但可惜我準備拿撈箕去幫手時，條魚就甩咀走了，連相都未影便回歸大海，慘慘！之後水開始大退，變了飛機流，浮波像開了Turbo的飛倒去，更壞的情況係打粉引來成海泥鯭，D泥鯭球化餌速度快到冇野講，如是者不停化餌，㸃様近打遠釣都是冇用，最終打清晒粉釣清晒餌，完成餵魚動作，快快收野返市區雪冷氣降温，走人時表弟畀咗條碟頭火㸃我攞，佢話入扣太深，解死咗條魚放唔到，咁就唔好浪費了！回到家我有D頭痛，可能曬得太勁吧，雪了一晚冷氣總算好返了。
今晚行佐敦買到好野20180724
今晚行佐敦經過新華，見到有隻harimitsu出魚鈎，重要有眼嘅鱲鈎，而且重係made in 老蓆添，見佢價錢平平地又有50隻，就入番兩個號數試試佢啦！之後去咗魚濃社，又見到D新到嘅Sunline線結，老闆話好好綁，十零蚊還有8折，又買餅用吓先。我又問老闆之前又話有人寄賣松田稔D浮波嘅？佢話一早畀人掃晒啦，我表弟本來想買的，但今次真係執輸行頭了！
R穿條連身裙來釣魚，邪一邪佢所以咁好魚！20180722
上幾個週日都唔好天，難得今日超好天，梗係叫埋R與表弟去解毒啦！本來諗住今日死流，魚訊應該會弱D，兼且又有幾班人喺度玩浮潛，都可能影響魚穫，但結果又出奇哋好魚喎，真係世事無絕對！唔知係咪R今日騎呢地穿條連身裙來釣魚，邪一邪佢所以咁好魚。哈哈！
鱲魚爆釣到要放生！
某年某月某釣㸃，我同表弟與一位新手老友去磯釣，由於我荼毒老友時間不長，我到場後都不能開竿住，要不斷教授老友磯釣知識，由開竿開誘餌，到生態及大自然認識，都希望他初步能了解清楚。至於表弟當然同我講關人屁事，第一時間釣魚至緊要，初時還沒有魚訊，過了粒幾鐘後起流，D魚就開囗，但很不幸，表弟鑊鑊中親魚都過石斷絲，我同佢講，鬼咩~淨係掛住釣又唔度水，㸃可以咁架！那時我剛開好竿，我就照常周圍度水，度好晒水後就發現對出竿半水有個水底暗礁喺度**，打幾匙羹誘餌再飛口餌落水，立即中魚過石，原來D魚朵晒在我正前方暗礁背面，所以一中再拉就過石，我同我表弟講，D誘餌唔好再打這處，我哋集中火力跟住D流打過左邊十零尺，令D魚離開暗礁追過來食吧。不久果然見效，中條黑沙鱲冇走雞，之後不停係咁起魚，看見對出有艇家在呔魚但呔唔到，望住我哋不停起魚，非常無耐，之後直情冇眼睇，開船走人！其實佢哋唔走我就有魚益佢，但既然走咗，我哋又食唔得咁多，就放生一半魚穫落海，叫做取放有道吧！ **度水的方法(我會以自己作中心㸃，用一個紙扇狀的形式用魚竿吊放鉛粒向出試底，當你由近至遠度水時，理應愈度愈深的，但如果明明近位20尺，而再出竟然得番十幾尺，那便要小心了，一定要再試出D，如果試到突然又深番，那通常都是海底有礁石吧！但如果一路變化不大，這只是海底有不平均的高低了，而並非有礁石。)
大戰泥鯭哥
有緣遇見經已長大的老朋友，身體的寒意立即被一團火燒得無影無踪了。急不及待便把魚鉤釣餌放到海裡去，不斷分析形勢加以操控，期待對拼快點來臨，但一次又一次得來的結果是吃了大餐不付款的對待！魚鉤已是為它的櫻桃小口而設，釣線已是0.8號的絲線，還不合心意嗎？「別再欺人太甚了... ..」！也許忘記了它已是荒野長大了的大傢伙，那會像碼頭公廁下的海底小混混這麼愚笨被你勾中麼！？我的小蝦釣餌一隻又一隻的消失去了，“荒島麵粉店”還仍未開張，使不出對付這傢伙的絕招啊！莫非就要在此地敗它一仗？不是吧！心中一憤，洩忿地把口中的香口膠作魚餌釣下去，「吃吧......吃死去吧」！ 正在思索如何克服這劣勢之際，向前一望，什麼？我的浮波鑽進海裡不見了！立刻把手中魚竿一揮，中了！迅雷之間比拼已展開了，它的拼勁令人意想不到是那麼強 ，整支魚竿被帶得彎入海裡！而且不斷以橫縱斜直不同的方向發難，力度之猛，一時令我難以處優，受制於0.8釣線的極限，只有不斷出絲來遷就這位口味奇特的傢伙！面前雖是腳能踩下的數尺淺水，那有幾人察覺再去便是突變的海底深淵！ 魚在拼，人在讓，其走動方式似是要利用深崖直角的暗礁優勢把你擊倒，很聰明的傢伙啊！迫得我要再踏前兩步才能作戰下去，可是之後再踏無可踏了！立於海底懸崖的邊沿，形勢看來更加不妙，但極端的形勢總是有破綻，就是站在於此，過石斷絲機會大減了，立刻地作出主動的迎擊，把魚竿以不同斜角度往左右揮動，形成無定向方位抽擊。「好傢伙，如何吧？你的招數我亦有得出賣啊！還比你使得更強吧！你的能耐我早已看穿了，你老是把對手的力量來源以逆方向對抗，再加以地勢變化作出掩護迎擊。現在我就要還給你享 受吧！迷失作戰方向的覺感好嗎？你輸定了」！惡鬥一輪，它的體力終於被我消耗了，幸好它的鋒牙利齒還未接觸到魚絲，否則只有斷線下場！終於上水面了，安全落入網中，30CM的泥鯭的確是不可小觀的傢伙！亦給了我一個非常愉快的比拼！ 泥鯭萬歲......！
