亞洲釣魚人 | Asia Angler

今日再去筏釣半天，全部都係泥鯭孫同池仔毛，相都冇影到就掉返落海，只係見到人哋有兩次起魚，一條係紅衫魚，另一條大約30cm的金頭鯛。基本上釣況都係好靜，釣到冇乜癮，廢事磨爛蓆了，早D出返市區食個下午茶，然後回家雪吓冷氣好過！

以前GAMAKATSU在香港有展覽我一定會去，還記得他們好鍾意揀9月做展覽，可能是近秋磯時份吧！而展覽中最高興的時刻梗係由磯釣名人松田稔教釣魚啦。教完釣魚就梗係與他來個合照吧，不經不覺這次合照已是11年前的事了，如再想見松田稔做show，睇怕都要親身去日本釣具展先見到他了！以今年72歲的他，真係令釣界fans擔心他會退休，不過也要面對現實吧，如果他退休前再來香港一次，那便是完美結局！

經過上次漁排見人中魚激鬥後，發覺都係唔好靠排上提供的撈箕好D，事關嗰D撈箕日久失修，畀人用到甩頭甩骨，真係中條大魚用來撈魚時先出事那便真的飲恨當場！所以昨晚去了漁家買咗支PM 出的短撈箕柄，百零蚊又幾靚仔，還可分兩個長度來用，平平地買個安心都幾好。

昨晚在FB見到好多師兄師姐都話今日同我一樣去解毒，個個都求神拜佛望今日唔好落雨，就係集合咗咁多釣魚人嘅念力，今日果然冇落雨，而且是出猛太陽嗰隻，我連防曬都冇搽，咁就瀨咗野！今日同R在西貢買咗兩盒雪藏沙蝦去釣，總括來講都有D魚仔過吓手癮，但同船一起來的一位師兄真係魚運返晒來，開釣唔夠一粒鐘就中條起碼3斤的紅鮋，不久之後又中條食用裝的金頭鯛，聽佢講原來他龜咗成7個月咁耐，今次乜 野好 運都返晒來了，還聽到佢講D魚餌是用生蝦及爆丸來釣，爆丸我成日都聽見，但還是未用過，有機會真係要試吓先得！

早幾日前天文台又話今日行雷落雨，㸃知昨天又改囗風，我梗係立即去買魚餌等今日同R解毒啦，今日真係全日風和日麗，好天到爆！而且遇着生流大漲，真係中嘅魚種都多D。分別有沙鱲、扯旗鱲、黑梳欏、連米、沙鑽、 黃釘、 火㸃及三鬚！應真種類豐富，完全解晒毒！

見後兩天又話落雨，今日就一早同R釣返個早水，是日初三大流，早上大漲到橋躉都差㸃蓋過，有船經過D浪湧都炒晒上去，見到有師兄上去釣魚都十分狼狽。今次我又係中埋D放生級魚毛，而R繼續魚運當頭，中了兩條接近腳板size的火㸃。同場有位師兄認得我，同我打招呼，與他吹開水佢話夜晚已喺度釣，而且勁多蚊，聽說佢朋友中了幾條黃腳，但自己就一條都未中到，真係釣魚除了技術還要講魚運！釣到中午時份，我同R2個人3兩蟲便玩晒，於是執野走人，經過那位師兄度say good bye，他仍然好有恆心地作戰，祝願佢中返條大魚開齋啦！

早嗰幾日打風落豪雨，過多一兩日又話狂風雷暴落成個星期雨，今日大好時機重唔去解毒還等何時！？今日釣況又係扯旗鱲B嘅世界，我D魚餌又係畀佢哋玩晒，但同上次一樣又係中隻大八爪魚，還比上週那隻更大，接近我隻鞋嘅size！而R小姐最近D魚運比我好，除了中那些搞搞震的扯旗鱲B之外還中了很多其他的魚種，喺呢度我唔出太多她的相，留返佢在自己的FB專頁post出來吧！

趁住今日有風好天氣，立即同表弟及R小姐去解吓毒，今次我的收穫麻麻，全日瘋狂地中埋D扯旗鱲BB，真係9成魚餌都係畀佢哋玩晒，唯一有㸃好玩的便是有次中扯旗鱲B時中途有隻大頭八爪魚想打劫我，鬥力之間被我勾中，即時被我逮捕，呢個故事教訓佢做D犯法嘅事要付出代價！而表弟及R就有魚運，給他們過足手癮，最開心就是R，中了好耐沒中的目標魚，黑沙鱲是也，雖然size不大，但㸃都係中咗，我都替她歡喜吧。