2018年精選開心記錄照20181229
2018年快將完結，又係時候盤點今年釣況，今年主要以舒服hea釣為主，所以魚穫不是很突出，但都叫做有D魚玩吓，今次選出幾張是新郵票或新紀錄魚，但都有D是令我玩得開心的記錄照片。
文章
2人加埋先中得幾囗20181225
聖誕同R去解毒，但好疏囗，D魚唔太開囗，只是其中一口魚訊是大魚吧，頭一吓試餌，等了一陣又來，收兩手絲，再大口食埋來，成支竿向海 勁彎 ，立即抽佢一吓，但可惜勾不中嘴，走了！全日2人加埋又係先中得幾囗，泥鯭唔啱食，放埋。之後返市區食tea！
古大俠的刻名解勾器終於到手20181208
使 用方法: 首先把魚穫帶到安全地方，跟住把解勾器頭部的斜坑套進魚絲去，然後在柄後一手拉緊魚囗中的魚絲，一手把解勾器頭部順勢滑進魚囗內，直到頂到魚勾保持"隊"實，由於魚勾滑入解勾器頭部要kick實內坑，所以叧一隻手要保持拉緊魚絲，這時條魚應該是凌空抽起了，最後雙手固定地一上一落快速chok一吓，條魚便會甩咗出來了。以上動作幾秒至十秒完成，新手可能要用多D來練習吧！如果熟練可以單手解勾，另一隻手可拿住條魚。
Shimano鱗海盃賽前交流會20181207
今晚高橋哲也又來港會一會釣友，見夜晚有空我又去探吓高橋同佢拍吓照，回家看返十數年前與他D舊合照，對比現在的樣子真的暴露了釣魚人日曬雨淋的練歴，令我忽發奇想，如果釣具品牌出埋防曬護膚品，可能都有得做吧！
偷釣幾粒鐘20181204
R話明天打後成個禮拜都下雨，重要凍到十零度，想釣魚都有難度，於是今日同佢偷釣幾粒鐘解定毒先，不過今次魚穫麻麻，但叫做唔使龜吧。今朝上船R整咗蝦醬芥籣配煎雞扒、節瓜章魚湯做早餐，多謝R！
磯釣人人有魚中20181124
今日三劍俠去磯釣，趁住大流釣返兩手，全日4、5級風，找了個避風位作釣，表弟在碼頭已急不及待去公廁開粉，去到釣場他已立即開竿，我就例牌要開兩兜餌，所以遲了很多才作釣，雖然表弟釣先，但第一個中魚竟然是R小姐，她高興極了，她練習磯釣已一段日子，知識與技術也有提升，但就係未中過目標魚，今次真的發威中了條黑沙鱲了，而且她說這條黑沙鱲是釣咁多條之中拉力最强，解晒毒。前後不到5分鐘，表弟又中條石蚌，至於我就中埋D魚仔，直到打晒我兜餌都係一海魚仔冇料到，之後我齋用釣餌作釣，釣釣吓冇晒魚仔化餌，機會來了，立即投下釣組到我之前狂打過粉的位置，不到10秒立刻飛波拉竿，我唔抽竿都唔係人啦，嘩！拉力非常强勁，令我全日的霉氣盡消，玩了片刻，條魚上水，是條靚仔連尖來的，爽死了！之後不久又中黑沙鱲又是拉力十足，最後再中多條連尖便冇晒釣餌了，但今日已十分滿足吧！
全無流水，一潭死水20181120
今日下午有空檔，同R去咗Hea釣幾粒鐘，玩浮波不打餌。由於唔知D內地人有冇逼爆東涌，所以R煲了冬茹瑤柱滑雞粥做午餐，我哋唔使同人逼去食野。去到釣㸃食完野便開竿作釣，一飛個釣組落水，發覺全無流水，有如一潭死水，釣到應該水漲之時，竟然D流一D都冇郁過，最後我只中老坑及油立各一條，R只中條黑沙BB。
Daiwa救生衣20181114
我的Daiwa救生衣出廠已6年了，而且舊款物料很厚，穿起上來又熱又臃腫，應該係時候換過件，行晒佐敦D釣具店，最後去咗世界找到件啱心水嘅Daiwa老救，而且佢哋又做緊特價，重有5倍積分當錢使。呢件老救設計輕巧，物料夠薄，釣魚時行動方便很多，而且冇咁熱，於是我就掃埋佢最後一件，等釣魚着新野先！
精口黑沙大鬥法20181113
上次磯釣R話唔夠喉，話要今次再去解毒，R知我肯陪佢，特登用鮮魚湯底煲了瑤柱海鮮粥給我做早餐，味道果然鮮味無比，多謝R！去到開竿第一投，我先中條唱歌婆，之後咩魚都有D，全日所有魚都好精口，特別是條黑沙鱲，先來輕輕啄兩吓，之後成分鐘都冇反應，我就把條蟲扮逃走地拉郁兩三尺，跟住佢又啄兩吓便停了，我又再拉，如是者玩了四五次，第六次條鱲先拉竿頭，我立即抽竿，中了！條鱲中伏後瘋狂拉竿，猛烈游走，手感非常良好，玩到夠皮便起佢上嚟，滿足晒。而R都有幾條魚中吓，今次都叫做解到毒吧！